Mission & Evangelism

WSBAK  Mission Kümla

Kilekithitsa: WSBAK no Mission Luche mulalu akeu ghenguno Ampeu Alhou jepipi tsü ani. Hiye WSBAK lo aküpülümiqono aküakinni, akukhu kighini, eno amulo kuchou pesü Alhou tsülu keu ghenguno Nagami eno ayeghiqha zülo Ampeu Alhou jukuvu shitsülu akeu ghenguno Nimpeu Jisü Khristo je sheqhelu ani. WSBAK no mission mulalu akeu ye alaghi kini lono mulalu ani. 1) nilikhi nikukuhou bocholo, 2) khalacheu inami yeghilo mulalu ani. Itehi kiu mulalu anikeno hi aqhouno ikhonheikeu lono küpülümiqo lau yepithi küsajelu ghi akighini laju ani.

1). Nilikhi nikukuhou bocholo: Ampeu Alhouno WSBAK lo küpülumiqo kümghatsü  keuye akümzapuke. Küpülümiqono puloniqhiyi Alhou juküvü shitsü achekeu ghenguno tamono inikhutsü acheni. Nongu kümtsü sasü kusholumo namu nikighini loye tamono nongu ghenguno inikhu tsü ani. United Baptist Church, Hovishe Village Ghami  Baptist Akukuhouno jüsü ani. United Baptist Church, Nihokhu Ghami Baptist Akukuhou no jusü ani. Nepali Baptist church, Niuland, Kuhoxü Ghami Baptist Akukuhou no jusü ani. United Baptist Church Pihekhu, Pihekhu Ghami Baptist Akuhouno jusü ani. Alolono qoipeghino akukhu akighini gholo nokimiji qhino tsuakeulo kupukuno shi kumghatsü chekeu Lhouno Paw kükümgha ghoki nongu lau alau qopuwu tsü apeniu.

2).  Khalacheu inami yeghilo mulalu akeu  china

i) Pathek, Thailand: WSBAK Mission Field hipau ye 2005 lono khaqhino mula ighilu ani. Rev. Khevihe Yeptho no mula tüghü-u shiluno Alhou kümla pekholu. Mission Field hipaulo ye Karen shiyeh Buddhist chineh kulumiqo gholo mula ani. Baptist Kukuhouki lakhi Ino Khehovi Yepthomi kibono (wovekeulo Chairman, WSBAK Council) shikeu mulatsüno itehiye küpülümiqoye Akümllaki hileno Alhou sheqhe eno mullalu ani. +Alhouno alau pakibo kümghatsü apenike inikhu tsü ani. Ino Bivito no Missionary shighi a-a hipaulo mula ani. Nihokhu ghami Ino Ghonito Zhimomi & atianuqono missionary tha tsüno mula ani. 2015 mpelo timi tsügho Baptiz shiluva. Küpülümi kümtsüno tamono inikhutsü apenike laju ani.

ii) HBCA Namphainung, Tirap District, Arunachal Pradesh: WSBAK Mission Luche hipauye 1993 lono khaqhino mula ighilu ani. WSBAK no mula akeuye Mosang shiyeh gholo mulalu ani. Hilehi Akighithi kiphiki yekala A lono yekala VIII kutolo khaqhino kiphimi 325 shou ighino philu ani. Nishiayeh Missionarymi shikükami 6 itimiqo shika ani. Missionary kinino Atsakiviu (outreach) kümla shi ani. Akukuhoki 19 khaqhiluvea. Fellowship lakhi ani eno Baptiz kikihi 1025 ani. Alhouno pakutakeu lono ningu gholo mulatsü akeulo kupulumiqo kighini kughuchove tsüpemonike nongu kighini laju ani.

HBCAiii) West Kameng, Bomdila District, Arunachal Pradesh: West Kameng  Mission Centre ye Bomdila lo khaqhino Miji, Bogun, Aka, Monpa, Sherdukpen shiyeh hipaqo gholo mula ighilu ani. Mission Field hipauye 1999 mpe lono huthulu. Itehi  Akukuhoki 19 khaqhiluvea eno Fellowship 3 ani. Baptiz kikihi 1700 shou shiva.  Ni Sümi missionarymi timi 7 eno local Evangelits kümtsü kuqhakelo pano 17 lotoshi süküsü shino mula ighilu ani. 2015 lono huthuno Thahekhu Ghami Baptist Akukuhouno lotoshi jusüno mulawonikeu shi pekithiveno huthuvea. Mission luche hipau ghenguno küpülümi qono tamono inikhutsü apenike shikimthi ani.

iv) Dhansiri Valley Kothalguri, Assam: WSBAK Mission Luche Kothalguri Assam lo akeu ye 2002 lono khaqhiveno mula ighilu ani. Itehi Baptiz shivekemi timi 29 shiva. Mission Luche hipaulo Kachari shiyeh lau mulalu ani. Akukuhou lakhi eno Fellowship lakhi ani. Eralibill Sümi Baptist Akukuhouno Akukuhoki mulatsüno küpülümiqo hileno Ampeu Alhou mllalu ani. Er. Ghokuto Assumi kibono Ino Xukhupu Missionaryw tha tsüno mlalu ani. 2015 lono huthuno Kushaibill Sumi Baptist. Akukuhouno Ino Avito (Ravi) Missionaryw tha tsüno Alhou kümla shilu ani. Mission Luche hipaulo assu-atu chineyeh lono Akuxupu Lhou lau xaideighinikeu ighono sho ani tighenguno kupulumiqo nongu kighinilo tamono inikhutsü apenike akighini laju ani.

dimasa

v) City Ministry: Itehi WSBAK Mission Luche India lo aphughi lo niw timi ghenguno mula ani. Delhi Sümi Christian Fellowship 2008 lono khaqhiveno ni Sumi shiyeh gholo mulalu ani. Ino Kaboto Kinny no Pastor shiani. Nihokhu Ghami Baptist Akukuhouno Pastor tha tsüno Alhou kumla shilu ani. Sumi Christian Fellowship Shillong ye 2011 mpe lono huthuno WSBAK no lotoshi Pastor süküsü shiveno jusü mula . Ino Mughalu no Pastor shi acheno itehiye Ino Mughahoto Zhimomi no Pastor makho puno ni Sumi Shillong lo akeqo xaqhelu ani. 2015 lono huthuno Toluvi Ghami Baptist Akukuhouno Pastor tha tsüno mula ani. Alhou kumla shiluani hipau ghenguno tamono inikhutsu alo.

2015 Mpelo kimiji

1.WSBAK Mission Field akeqo  xujuno shikumtotsü eno mission kümla pekho ani.

  1. Missionary sponsoring kibo, luthu, akukuhouqo xujuno Mission kümla ghili pesü küsaje eno alau mulalu, tsülu apenike hakite anikeu.
  2. WSBAK Kukuhou kümtsüno Mission kümlalo kutubo chosülu penike ghutu tsü anikeu shi Alhou lau lajughi inikhu ani. Akukuhou kümtsüno tamono inikhutsü eno kiu aghikeno pesü WSBAK mission kümlalo kutubotsü keu ghenguno shikimithi küsajelu ani.