Department of Christian Education Ministry
Müla akeu kimiji
Ighinikeu tiqheli kivi ghenguno jukucho shino mula ani. Sakiphe kivimi nizüumi, Alhou no alokütsü tsüno itimi/tiqhelimi lau Lhou kighithi eno kukhu ayeh pesü qophe eno saphe puthu ighikeu pasülo mula kibe ighilu ani.
Akighithi vechewo akikili süghicheni eno timi küxülo SHIKÜKA eno GHUTU tsü apenikeu ye Alhou zahkütsü gholo akhotou shi ithulu ani; “Atianuli shika piyelo……hipaqo pikide kithe alo…..”(Zahkiniu 6:4-9).
Alhou sükümsa kighithi no aküxü ghutu luve aye, tiye asüchedo achipiu lono; chilu akeu, shikalu akeu eno papenike pukaputsa akeu, hipau tüqhüdo lono chikamujo luve aye tiqheli kivi ghenguno imasü ani. (Akukuhou boqhami no ghutu keu tsa) St. Frances Xavier “itimi küxü pesü itsüluaye assatheve kethiu amlo küsapu kühave nani.” (Sakiphemi no pujulukeu tsa;)
Mahatma Gandhi no ishipi “Ninguno kuchou külakishi anishi aye, itimi launo huthulo.” Itimi süchedono aküxü küpüjü ghenguno aboqha ghopeqhi akeu ke, asüchedo hipau khileve aye aküxü küpuju kughuchove ani.
Kichekütsü eno mijekütsü kühave aye lajupu puhave nani. Hipaqo tsah nhethilo jupukuno akimiji shino tiqhelimi lau Lhou kümla shika eno qokiphe shi ighilu ani. Küqhano tuchomujo akeulo alau muto kithe ani nolo.
Ampeu Alhou ningu kimiji tokulu tsüpenike tamono inikhu ani nolo.
2015 mpe lo mula ighilu akeu eno azuwu mula woni akeu
Itimi shikukami qokiphe
Itimi shikukami qokiphe küpüghü amqo kini shino tsülu, Akukuhou kümtsüno akhoto küpüghü vethaluno ampe kighilo shikükami kutomo ipighilu akeulo Akukuhou 121 lono shikükami 345 no ighino qokiphelo sülu. Hiye ampe kupuju lo itimi khishi shika eno tucho nikeno apasü pesü ghutu keu qokiphe.
Akimiji “Iwu bheri tucholo” ipi qhino qokiphe tsülu. Qokiphe hipaulo Dr. Lovely James, Lecturer, Eastern Theological College (ETC) Jorhat, lino ighino qokiphe tsülu.
VBS Shikükami Qokiphe
Vacation Bible School shikükamiqo qokiphe Mozaqhi 14-16, 2015 lono WSBAK. Mission Centre, Akuvuto Thahekhu lono shilu.
“Jisu eno Ni” (Jesus and Me) akimiji shino shikukamiqo VBS qokiphe tsulu. Shikukami 217 no ighino qokiphe hipau lo sulu.
Hipau vekibe ghi June 26 lono July 28 lono akukuhou 11 VBS kuholu ani.
Jesus Loves You Partners
Itimi küxü lono Alhou kümlalo küsajethi penike aküpüghü hipau pekithi ighilu ani. Eno küakini hipau lono ithulukeu pesü akiphiki qolo Alhouu kümla shilu ani.
Ampe hipau loghi alokümsü kutüpove tsü kemi shikimithi ani eno Executive Committee, CED vechewo xakütha shilukeuno, WSBAK audit züuno küakini kiu hekütsülu keno akikihi lo süluve nikeu ghenguno khashi kuloji akemi kümtsü Amuthaqhi (September) loye Hiyam lo pekithi vetsü penike ghutu tsü ani.
Children Development Programme
Ampe hipaulo akiphiki hipaqolo Alhou kümla shinike pekithi ani:
IMMS. Aküvüto, Thahekhü
Baptist School Kuhuboto Town.
New Era School, Namphainong, Arunachal Pradesh.
Kihimipemi 8 (Children Ministry Team) no wuno akiphiki hipaqo lo Lhou kümla shinike kuto ani. Nongu kighini lo kümsülu tsü alo.
Sakiphemi qokiphe lu akeu
Inoli. Henitoli Viyishe, Child Evangelist, M.A. Holistic Child Development, ETC Jorhat lo Mozaqhih huthuvea.
Ino. Y. Vishiho Shohe, Secy., CED. Atsala: 24-30 Mozaqhih 2015, “Imagine 2015” qokiphe hipaulo Chiangmai, Thailand lo wuno ighiva. Nongu kighini eno kukuphu ghenguno shikimthi ani.
Kutupono mulakeu lo Alhou ningu kümgha tsü peniu!
Khristo qeu,
(Y.Vishiho Shohe)
Secretary, CED. WSBAK.