DEPARTMENT OF CHURCH MUSIC MINISTRY

WSBAK MUSIC KÜMLA GHILI 

  1. XÜGHILI:

WSBAK lo Ale kighithimi avehupu shivekeu ghenguno WSBAK Council no 2005 mpe lono Xakütha shino Music Promoter lakhi süküsü shinikeu shi (WSBCA 27/05). Eno hipau xakütha kiqi lono 2007 mpelo Rev.S.Vitoshe Swu no Executive Secretary shi ake lono WSBAK lo atüghü-u shi Ale kümlapu ghenguno Ino Hojevi Cappo pesü Music Promoter ipi süküsü shini keu shi xathalu. (WSBCA 3/07). Ino Hojevi Cappo ye Anihqhi (July) 3, 2007 lono lottoshi Music Promoter atüghü-u shi WSBAK lo süküsü shilu eno ishi 2015 kutolo mülah ighi ani.

2007-2011 mpe kutolo Music promoter likhino Executive Secretary eno Centre staff sasü aküpüghü pekithi no mülah süsü ighi. 2012 mpe lono Council lo pekithino Music Komiti timi 5 kishetsü:

  1. Ino Khehovi Yeptho (Council Chairman) member,
  2. Ino. Kahoto Zhimo, member,
  3. Rev. Luhevi Zhimo, member,
  4. Ino Visheto Awomi, member
  5. Er. V. Pihoto Kiba, convenor
  6. Rev. S.Vitoshe Swu, Executive Secretary (Ex.Officio).
  7. 7. InoHojevi Kappo, Music promoter

Panongu kükümsü kivi vechewo Music Promoter kuphu tsüno 2014 mpe kutolo mülah ighilu. Masave keu ghenguno Komiti no Council lau akiye lono qhüiniju keu kiqi lono WSBAK Council no pulove tsüno Ale kümlah pekhonike ghenguno WSBAK lo Ale ghi lottoshi Department lakhi shiveni ipi xathalu (WSBCA-20/14 No.9). 2015 mpelo Rev. Dr. Hevukhu Achumi Executive Secretary shiake lono  WSBAK Council Küküpütsa Ghixuqhi 11, 2015 lono timi hipaqo pesü Ampe 2015-17 kutolo Music Committee members kihimpimi shipenikeu shi kishelu (WSBCA 29/15):

  • Inoli Kakheli Chishi, SBC, Dimapur.
  • Ino Vikiho Sümi, Lhomithi Baptist Akukuhou
  • Ino Kikavi Zhimo, SBC, Iralibill.
  • Inoli Hotoni Chishi, Chekiye Village Bapitst Church.
  • Rev. Luhevi Zhimo, SBC, Unity Village
  • Dr. Hotokhu Chishi, Council Member
  • Rev. Dr. Hevukhu Achumi, Executive Secretary(Ex.Officio).
  • Er.Ahoto Zhimo, Council Chairman, (Ex.Officio).
  • 9. Ino Hojevi Kappo, Music promoter.
  1. ALE KÜPÜGHÜ MÜLA IGHILU KEU HAMI:

Ale küpüghü ye akimichishi 2008 mpe lono huthulu. Akukuhou lo ale Staff notation philu eno ale achipi lono phelupenikeu no akimiji akhotou shino qokiphe kümla shi-ighilu ani.

WSBAK Golden Jubilee pini keu küpüghü ghenguno akukuhou lono lo ale phekulumi lhothemi 50 kishe puwutsüpe eno tipaqo sasü ado hami qokiphe tsüno Ampe 50 Jubilee choir shilu. 

Qokiphe küpüghü shi ighilu eno shi akeu hami:

  1. Music Concerts
  2. Music Seminar for Youth Leaders.
  3. Music Seminar for Sunday School teachers.
  4. Area kini-küthü peküqhano staff notation shika.
  5. Music Seminar for Pastors
  6. Music Seminar for Yekala X Students (yearly) with theme “Tune your Life”
  7. Gospel Singers Seminar cum Musical evening
  8. WSBAK Aghakütsa lebo workshop cum Indigenous Music concert
  9. WSBAK & Remnant Mission Academy (Korean Musicians) küqhano Aqhi lakhi (one month) itimi qokiphe tsülu. Tiye, Piano, Violin, Bibles Class, guitar, wall paintings qokiphe tsülu eno Music Concert shilu.
  10. Centre Church, aküvüto Staff
  11. Lejole eno Totimi le eno akighilhe qokiphe.
  12. Music Seminar for XII and Above (yearly) akimiji: Ale eno Iküxü)
  13. Akukuhou Le kaku qokiphe.
  14. Ale eno Ni Sütsa qokiphe küpüghü.
  1. ALE KÜMLA LO JUKUCHHO HAMI: 
  1. i) WSBAK Music Department kimiji akhotou ye WSBAK kukuhou lo Khristo küpülümiqo pelo ale vechewo aküpülü küxülo Alhou sasü kupunukhoilu apenikeu ke. Eno tipau kiqi lono Department ye akukuhomi mijino ale küpüghü püghü anani. 
  1. ii) Music Seminar jeli anani: Timi kutomono ale kimiye anamu ado kutomo peveno ale qokiphe lumüla no acheni, tighenguno atsala hami ghenguno Ale jeli qokiphe tsü anani. Amulo kütsümi ye atsal hami qokiphelo ssülu keughi peithalu ani.

iii) Ni Sümi pu-asü le kungo kivi eno Ni lebo jeli qokiphe tsü eno phuju keu shi anani: Ni le eno ni lebo jeli ye Alhou no ningu tsüke. Ningu kutokumo eno ado aghuloki lhoküsa lono kutomo pühava, ikemu Alhou shikimthi! hami phuluvea eno phukide, iqhiphelu akeu pesü qokiphetsü anani.

iv) Ale kighithi lo avehupu shi akeu ghenguno Sütsa lono kaku jeli mülaphe nani. Akiphi kaku jeli: tiye Sunday Schools, WSBAK Mission Schools, Teachers eno training jeli eno akukuhou no avehupu shiakeu ghenguno kaku jeli mülaphe nani.

v) Music Concerts: Ampe atsütsü Music Concert shinani. Tiye ni dolo alekiphe eno küghüghathi kemi likhi kumono Khalaumi ghi sasü püghüküqhano aküpüghü hipau shinani. Ale kivi chilukeu lono timi kutomo lau müzükütsü ighino ighinikeu lo Ale kighithimi ipeghilu cheni.

vi) Ale laghilo akuchuqu kiphi phino ale lono aluche shinikemi laghi: Tiqheli kivi ipikeu ye ale kighithimi ghi süküqhano piani. Ni timi agho kütsümi kutomo ipeghi ani eno qokiphe luni keu lo alaghi müthano akeqo laghi kichetsü eno kuphuni keu ye WSBAK kimji gholo lakhi ke.

vii) Ayeghiqha kütami sasü küthsükime nikeu: Ale kighithimi ayeghiqha kütami sasü ighi eno niu timi qophe piye eno niw timi qopheno ayeghiqha kütau ale vechewono Alhou shepe shiwu penikeu küpüghü anani.

viii) Project Jeli: Music Department vechewo itimi Le kaku mülaphelu penike Council no pulozah tsüveno huthuniye kutova.

 ASHEHO TSAH: WSBAK lo Ale kümla thukuwupu kümla ghenguno okükümsü kivi, okighini eno alaghi thwokha lo okukuphu avehupu shi anani. Tighenguno olokümsü laju ani. Ningu küqhano pükapütsa müla keu lo Alhou mulokiqi alupeni eno Pa kümla allau ale vechewono pekholu penike akighini lono yepithilu ani.

HOJEVI KAPPO

Music Promoter, WSBAK

Aküvüto

 

Photos of Music Department:

music-dept-1
music-dept-2
3