DEPARTMENT OF WOMEN MINISTRY
Ni küxü peghitsü chekeu Lhou zülo agigihu pe qhitsü ani. WSBAKWD hiyam lono agigihu petha pe totimi sakiphemi eno totimi kümtsü lau tsülu ani.
XÜGHILI
WSBAK Ampe Shekha hoho 1966 mpe Zhuikhü Baptist Akukuhou lono kuho ake lono aqo-ahono xathaluno Women Society ipi aje kunikeu shi xathalu. 1966-75 kutolo Women Society ipi aje kuno ampe shekha hoholo ahoho (service) lakhi ikhiphe tsüno Totimiqo pelo kuholu pe che. Totimi hoho aghimasave keu ye ashi aghungu lo totimiqo xaqhe eno shikumto anikeu ghenguno ke.
1976-78 loye aje kukideve no totimi kuposhukulu ipi peithaluve. Itaghi Lusaqhih 24, 1978 Xükiye Baptist Akukuhou lono Women Fellowship kuho ake lono aje kukideveno 1979-1980 kutolo Home Conference ipi aje kuho che. 1981 lono huthuno Women Conference ipi aje kukideve luveno Nihokhu Baptist Akukuhou lono Süpuqhih 11-13, 1983 lono WSBAK Women Conference atüghüu kuholu. Alaghi kutomo lono WSBAK Women Department thuwu akeu ithulu no Alhou shikimthi ani eno khunoqo WSBAK Women Department phuqhe ighitsü kemi kümtsü Ampeu Alhou no kümghatsü apeniu!
KHASHI MULA IGHILUVE KEQO
I) TOTIMI SAKIPHEMIQO PHUKUTHO
3th -5th Suphuqhih 2015 lo Associate pastor women qokiphe ye CBCNEI Guwahati lono kuholu. Associate pastor women pano 73 no sülu eno alaghi jeli lono alokepushi qokiphe ithulu. “Jukuchho pekhoni” no ningu kimiji shino kuholu.
II) ANGUAGHA BEVEKEMI NIPUQO KUPOSHUKULU
Supuqhih 21, 2015 lo Anguagha bevekemi nipunoqo sasü atsala lakhi kuposhulu. Pano 26 ighino kuposhulu. Süghüna Baptist Akukuhou no amulo kiqishi sasü tsü.
III) AQAHUTO TOKUJO ATÜNA PHUKUTHO
Amuha 13, 2015 Aqahuto tokujo Atüna phukutho Kiyeto Baptist Akukuhou lono kuholu. Akibo shiqhepukuni no atsatto shino kuholu. Atüna 21 ighino kuposhulu.
III) TOTIMI LHIDHI KISHIMI KUPOSHUKULU
Amuha 18 2015, ni Sümi Totimi lhidhi kishimi sasü Aküvüto Mission Centre lono kuposholu. Lidhi eno pa khuayeh no atsatto shino kuholu. Lhidikishimi totimi 40 ighino sülu. WSBAKWD no aküpüghü hipau alokepu shi pughu akeu lo kusü ani.
AGIZÜLO AKUPUGHU AKEQO
WSBAK tsalaphi lo aketoi Women Department vechewo agizü lo aküpüghü akhoto pekithi puakeu itaghi ghuttu kithe tsü ani.
CHIMEMI-SAMEMI KUPOSHUKULU
4TH AMUTHAQHIH 2015 LONO Chimemi Samemi kuposhukulu ani. Aküpüghü hipau shilu akeu kimiji ye shikumto tsü nikeu eno kükümgha kighini betsü nikeu ghenguno ke. Tighenguno chimemi-samemi kümtsü kümghakeu shilu penike alokivishi kusü ani. Chuqu kusho ye ame lumono WSBAKWD je lono Women Executive member qono kutotsü ani eno ikuqho-ikiqi ye Akukuhou no jusü tsü penike shikimthi ani.
Akukuhoulo Totimi sakiphemiqo qhuinju akeu ye chimemi-samemi khunoqo no atsala hipau lo ighilu nani keno, kighitheno aje yehpe WSBAKWD tsüpuwutsü penike shikimthi ani. A-a ye Aküvüto Mission Centre eno Ado ye ayi 10.00 Inaqhe lono Avelau 3.00 kuto.
SAMARITAN HOME MINISTRY, WSBAKWD
Amuha 18, 2002 lono Samaritan Home khaqhilu eno hiye Priscila Centre Guwahati lau no akükümsü hipau nasüghi no huthulu. Wovekeulo Secretary, Women Department Ino Kanili Aye vechewo thokha kilekughu shino WSBAK Council no pulozah tsükeu vechewo ‘Samaritan Home’ ipi Women Loka qholo aqoaho xakiqhe kümla hipau huthulu. Hukuthulo ampe kini (2) kutolo Priscila Centre Guwahati no sponsor shitsüno mula ghilu. Itehiye Ili Ilitoli no Coordinator shi ani eno li gholo staff kini (2) ani. Aküxü tsüno mula ani. Itehi totimi (inmates) pano tache ani.
Alokuthu lo kupulumiqo no akukuphu kivi gholo akighi lono kümsülu tsü chekeu ghenguno kümtsü lau shikimithi lu ani. Samaritan home lo weaving ki küha, ikemu küpülümiqo kukuphu lono khashi no huthu no aki shivenike pekithhi wocheni .
Kunguw kiu yepithi kilelu ani keno kimiyeno tamo akighini shitsü apenike qhuiniju ani.
Shikimthi.
Khristo qeu
Inoli Easter H.Shohe
Secretary, WD WSBAK